Plagosja në Tiranë e biznesmenit Sino Llanaj ndodhi për shkak të konfliktit mes ortakëve për shitjen disa herë të apartamenteve të pallatit që kanë ndërtuar.
Ndërkohë i plagosur mësohet se ka mbetur dhe një kalimtar i rastit, i identifikuar si Klodian Komini.
Dyshohet se autor i plagosjes është ortaku Albert Allmuça.
Dy pronarët Llanaj dhe Allmuça kishin rënë dakord për ndërtimin e objektit brenda vitit 2019, por kontrata mes tyre ishte prishur dhe objekti nuk është ndërtuar, duke sjellë probleme jo vetëm mes dy biznesmenëve, por edhe me banorët, që vijojnë të jetojnë me qira.
Vetëm katër ditë më parë ka pasur një konflikt fizik mes dy pronarëve dhe banorëve, të cilët kërkojnë ndërtimin e pallatit sipas kontratës.
Ndërkohë, ditën e sotme ka qenë investitori Sino Llanaj fillimisht në objekt, bashkë me disa shoqërues, dhe më pas ka shkuar edhe pronari Allmuça, edhe ai me disa persona të tjerë. Pas konfrontimit fizik, ka pasur të shtëna nga grupi Allmuça, ku është plagosur biznesmeni Llanaj dhe kalimtari. Burime nga policia thonë për gazetaren Bezat se është identifikuar personi që ka qëlluar me armë dhe po punohet për kapjen e tij. Në dëshminë e parë pas plagosjes, Sino Llanaj ka thënë se autor është shtetasi Albert Allmuça.