Një 30-vjeçar është vënë në pranga nga policia e Tiranës pasi gjatë kontrollit në mjetin e tij është gjetur një sasi kokaine. I riu ishte në vëzhgim nga policia, pasi kishte dyshime se ai shpërndante lëndë narkotike në kryeqytet
“Seksioni për Hetimin e Narkotikëve, në vijim të goditjeve të njëpasnjëshme kundër aktivitetit kriminal në fushën e shpërndarjes së lëndëve narkotike, bazuar në informacionet e siguruara në rrugë operative nga burime të ndryshme, goditi një tjetër rast, duke vënë në pranga shtetasin R. Rr., 30 vjeç. Gjatë kontrollit në mjetin me të cilin qarkullonte ky shtetas u gjet një sasi lënde narkotike kokainë, 2 aparate celular dhe një shumë e konsiderueshme parash të dyshuara të përfituara nga shpërndarja e lëndës narkotike, të cilat u sekuestruan në cilësinë e provës materiale së bashku me automjetin”, thuhet në njoftimin zyrtar të policisë.