Klubi i Tiranës, deri tani ia ka dalë të bëjë dy afrime në merkato teksa ka afruar Taulant Seferin si dhe mbrojtësin Zhozelin Behiratçe. Te bardheblutë nuk është sekret që kërkojnë edhe një tjetër lojtar për në ofensivë, por menaxheri i kryeqytetasve, Enton Spahiu thekson se nuk do të thotë se merkato do të mbyllet pasi të afrohet sulmuesi i kërkuar. Para mediave, Spahiu u shpreh se ka oferta për Muçin, mirëpo talenti aktualisht mendon vetëm të japë më të mirën në fushë.
“Kemi pasur negociata me sulmuesin bullgar, por edhe me sulmues të tjerë. Për etikë, negociatat nuk tregohen pa u bërë gjërat publike deri në fund. Për momentin nuk mund të japim një njoftim tjetër. Jemi në negociata me disa lojtarë, me disa opsione që i janë paraqitur stafit teknik dhe drejtuesve. Të shohim se si do të jetë procedura në vazhdim.
Nuk mund ta themi me 100% që po kërkojmë vetëm për një sulmues. Drejtuesit janë gjithmonë në kërkim të alternativave që mund të ndihmojnë ekipin dhe mund të forcojnë organikën tonë. Në fund do të merren vendimet me pëlqimet e stafit teknik.
Muçi? Nuk na shqetëson zhurma, është kampion dhe është i qetë, është i fokusuar çdo ditë në stërvitje dhe është i gatshëm që në çdo minutë të japë më të mirën për Tiranën. Ofertat nuk komentohen, janë pjesë e negociatave, por nuk është sekret që oferta dhe interesim për Muçin ka jashtëzakonisht shumë“, u shpreh Spahiu.