Testamentet dhe dëshmitë e trashëgimisë tashmë nuk do ruhen vetëm në arkivat e noterëve, por në një regjistër kombëtar. Kanë hyrë në fuqi tashmë ndryshimet ligjore që përcaktojnë se Noterët në të gjithë territorin e Republikës së Shqipërisë përdorin Regjistrin Kombëtar të Testamenteve dhe Regjistrin Kombëtar të Dëshmive të Trashëgimisë, për regjistrimin respektivisht të të gjitha testamenteve ose të dëshmive të trashëgimisë ligjore apo testamentare. Testamentet nuk do ruhen më vetëm në formatin fizk nëpër zyrat noteriale por edhe në regjistrin kombëtar.
Regjistri Kombëtar i Testamenteve dhe Regjistri Kombëtar i Dëshmive të Trashëgimisë janë pjesë përbërëse e sistemit elektronik të Dhomës Kombëtare të Noterisë.
Sistemi elektronik i Dhomës dërgon për regjistrim, në kohë reale, në sistemin elektronik të regjistrit noterial shqiptar, të gjitha aktet noteriale që regjistrohen në Regjistrin Kombëtar të Testamenteve dhe në Regjistrin Kombëtar të Dëshmive të Trashëgimisë, sipas rregullave të
caktuara në vendimin e Këshillit të Ministrave, për mënyrën e ndërlidhjes, nivelin e aksesit dhe të bashkëveprimit të sistemit elektronik të Dhomës Kombëtare të Noterisë me bazat e tjera të të dhënave.
Ministria e Drejtësisë ka akses të plotë në informacionin që prodhohet, regjistrohet dhe administrohet në regjistrat përkatës, në rolet: a) lexues; b) auditues; c) monitorues; ç) të prodhimit të statistikave përkatëse.
Aksesi, sipas vendimi, siguron që Ministria e Drejtësisë të mbikëqyrë në kohë reale, përdorimin dhe aksesimin e regjistrave përkatës. Noteri, si përdorues i sistemit elektronik, ka të drejtën e aksesit në të gjitha testamentet dhe dëshmitë e trashëgimisë ligjore apo testamentare, që regjistrohen prej tij në regjistrat përkatës.