Vazhdon momenti magjik për Myrto Uzunin në kampionatin hungarez. Sulmuesi i përfaqësueses shqiptare po kalon një formë të shkëlqyer me skuadrën e tij ku duke luajtur titullar, po shënon gjithashtu me rregullsi të admirueshme.
Ai gjeti rrugën e rrjetës për të katërtën ndeshje radhazi me Ferencvaroshin, duke e ndihmuar që të fitonte me shifrat 4-0 në fushën e Ujpeshtit, një prej skuadrave me emër në Hungari, por që në sezonin aktual luan për të mos rënë nga kategoria. Suksesi i mundësoi Ferencvaroshit që të shkonte +13 pikë nga ndjekësi më i afërt, duke mbyllur praktikisht kampionatin në një sezon që po e dominon totalisht.
Uzuni la vulën e tij në minutën e 76 të takimit, kur kërkoi me ngulm golin para portës kundërshtare dhe u tregua i aftë të përfitonte nga situata që u krijua për të çuar sferën në rrjetën e portës kundërshtare. Kjo ishte ndeshja e katërt radhazi ku Uzuni gjeti rrjetën me skuadrën e tij duke çuar në 6 bilancin personal për këtë edicion në kampionatin hungarez e duke u konfirmuar si sulmuesi më në formë i përfaqësueses shqiptare në këtë periudhë.