Në Kategorinë e Parë të Grupit B, sot u luajtën dy ndeshje. Egnatia që është edhe kryesuese e grupit, priste në shtëpi Elbasanin.
Një sfidë e lehtë në letër për të besuarit e trajnerit Gugash Magani, dhe që në fakt e tillë rezultoi duke qenë se miqtë rezistuan vetëm në pjesën e parë. Në fraksionin e dytë vendasit zhbllokuan shifrat në minutën e 55, ndërsa më pas Gashi dhe Krasniqi vulosën fitoren. Pas kësaj sfide, Egnatia ruan vendin e parë, duke u shkëputur me katër pikë nga ndjekësit e Besës, ndërsa Elbasani mbetet me 0 pikë në fund.
Ndërkaq, sfida tjetër ishte ajo mes Turbinës dhe Flamurtarit. Vlonjatët zhgënjyen në transfertën e Cërrikut duke u mposhtur minimalisht me rezultatin 1-0. Goli vendimtar ishte ai i minutës së 45 nga ana e Dacit. Pas kësaj sfide, vlonjatët renditen në vendin e shtatë me shtatë pikë, ndërsa Turbina mban vendin e tretë me 13 pikë, po aq sa edhe Lushnja.