Ministria e Bujqësisë ka shtyrë afaktin e aplikimit për naftë pa taksa deri në fund të marsit për shkak të fluksit të lartë të kërkesave.
Sipas njoftimit zyrtar të Ministrisë, vendimi u mor pas konstatimit të fluksit të madh të kërkesave në zyrat e AREB-eve nga fermerë në mbarë vendin. Aplikimet për skemën e mbështetjes me naftë pa taksa nisën më 15 janar të këtij viti e deri më tani në portalin e-albania janë regjistruar 15 120 fermerë.
Paralelisht me këtë proces, ka nisur dhe shpërndarja e kartave të para të naftës. Vetë ministrja e Bujqësisë Milva Ekonomi i dorëzoi kartën e parë të naftës aplikuesit të parë në skemën mbështetëse për naftë falas, fermerit Kujtim Lamthi nga Gruemira e Malësisë së Madhe. Gjatë ditëve në vazhdim, krahas aplikimeve në zyrat e AREB-eve, të fermerëve të regjistruar me NIPT, do të vijojë dhe shpërndarja e kartës së naftës, për fermerët që kanë dorëzuar tashmë dokumentacionin e tyre në zyrat e aplikimit dhe njëkohësisht kanë kryer dhe aplikimin në portalin e-albania.
Procesi i aplikimit online në portalin e-albania për fermerët e regjistruar me NIPT bëhet përmes kartës së identitetit dhe pas aktivizimit nga Tatimet ata duhet të vetëdeklarojnë dokumentat që disponojnë.
Ministria e Bujqësisë verifikon përputhshmërinë e dokumentave të deklaruara nga fermeri me ato që ka depozituar. Më pas, fermeri duhet të shkojë pranë agjencive të Ekstensionit Bujqësor (AREB), ose Agropikave për tu pajisur me kartën e naftës falas të cilën e tërheq në një pikë karburanti. Në ndihmë të fermerëve janë dhe zyrat e AREB-eve dhe Agropikave. Po ashtu është dhe një numër jeshil 08008383 në faqen e ministrisë ku mund të kërkohet informacioni i nevojshëm.