Shëndeti i kritikut të Kremlinit, Aleksei Navalny, është përkeqësuar, kanë thënë bashkëpunëtorët e tij.
Ata besojnë se jeta e tij është në rrezik. Ata gjithashtu thanë se vendndodhja aktuale e Navalny është “e panjohur” dhe se avokatët e tij nuk u lejuan ta takonin atë më 24 mars, megjithëse kishin një takim të planifikuar me të në burg.
“Jemi të shqetësuar për përkeqësimin e shpejtë të gjendjes së tij shëndetësore “, shkroi Maria Pevchikh, shefja e hetimeve në Fondacionin Kundër Korrupsionit të Navalny.
Më 15 mars, udhëheqësi i opozitës ruse, Aleksei Navalny, konfirmoi zhvendosjen e tij në një burg në qytetin Pokrov. Në një postim në Instagram, Navalny e cilësoi institucionin si “një kamp përqendrimi”. Ai tha se është zhvendosur në burgun IK-2 para tre ditësh dhe se është mirë.
Ky është një nga institucionet më të famshme të burgjeve të Rusisë me një regjim shumë të rreptë.
“Ne supozojmë se Navalny është transferuar ndoshta në spitalin e burgut dhe administrata po përpiqet ta fshehë këtë. Ne besojmë se jeta e Navalny është në rrezik dhe kërkojmë qasje të menjëhershme për avokatët e tij”, tha Pevchikh.
Navalny është arrestuar në Moskë në janar, menjëherë pasi është kthyer nga Gjermania, ku është shëruar nga helmimi me agjent nervor.
Ai është helmuar në muajin gusht, në një fluturim drejt Siberisë, ndërsa laboratorët perëndimorë kanë treguar se agjenti i përdorur në sulm ka qenë Noviçok.
Navalny ka fajësuar presidentin e Rusisë, Vladimir Putin, për urdhërimin e sulmit ndaj tij, por Kremlini e ka mohuar përfshirjen.
Në fillim të shkurtit, një gjykatë në Moskë ka konstatuar se Navlny, gjatë kohës sa ka qenë në Gjermani, ka shkelur dënimin me kusht, të shqiptuar më herët për një rast të përvetësimit të fondeve.
Gjykata ka urdhëruar Navalnyn që të shërbejë dy vjet e gjysmë në burg.
Në fillim të këtij muaji, Shtetet e Bashkuara dhe Bashkimi Evropian kanë sanksionuar disa zyrtarë rusë për, siç është thënë, përfshirje në helmimin e Navalnyt.
Duke reaguar pas sanksioneve, Moska e ka porositur Perëndimin që “të mos luajë me zjarr.”