Ish-kapiteni i kombëtares, Lorik Cana ka folur për Kosovën pas ndeshjes që Dardanët u mposhtën ndaj Suedisë. Cana thekson se Kosovës i duhet të fitojë eksperiencë, pavarësisht se në organikë ka kualitete. Ndërkaq, ish-mbrojtësi shtoi se Dardanët dhe Shqipëria janë dy ekipe të ndryshme.
“Duhet të shohim një rezultat afatgjatë, momentin që ke treguar sukses njerëzit kanë pritje, ta them më shkurt Kosova ka bërë hapa të mëdha, por përfaqësueses së Kosovës i duhet eksperienca, ajo ka shumë cilësi aty brenda sidomos në mesfushë, ndeshja e sotme ka qenë më shumë një leksion. E dini përgjigjen time sa i përket një ekipi të vetëm kombëtar, neve na duhen investime dhe te rinjtë tanë të kenë mundësi siç kanë shqiptarët në Zvicër apo kudo në Evropë sa i përket futbollit.
Përfaqësuesja e Kosovës dhe Shqipërisë janë dy skuadra të ndryshme, dy ekipe qe janë shumë të ndarë njëra me tjetrën. Kosova kur ka disa mungesa sidomos te lojtarëve cilësor siç është edhe Amiri për fazën mbrojtëse krijon shumë probleme, por është gjynah me ju bë presion djemve që për një kohë të shkurtë kanë arrit me bë gjëra të jashtëzakonshme”, u shpreh Cana.