‘Corona Vac’, vaksina e prodhuar nga kompania kineze e Sinovac e cila po përdoret edhe për imunizimin masiv të popullsisë në vendin tonë është përdorur për bluzat e bardha në Turqi dhe ka rezultuar me një efikasitet të lartë.
Në faqen zyrtare kompania farmaceutike Sinovak, ka publikuar dy prova klinika të fazës së tretë të realizuara me të dhënat e të vaksinuarve në Turqi.
Sipas këtij studimi në total ishin 7,371 pjesëmarrës, prej të cilëve 918 ishin personel të kujdesit shëndetësor. 1,322 pjesëmarrës që përfunduan vaksinimin me dy doza dhe hynë në periudhën e vëzhgimit 14-ditor dhe nga studimi i 29 rasteve shkalla e efikasitetit për parandalimin e COVID-19 ishte 91.25%.
Sinovac i filloi provat e fazës III për vaksinën e saj ‘Corona Vac’ në korrik të 2020 në katër shtete, në Brazil, Turqi, Indonezi dhe Kili. Në Brazil efikasiteti ka rezultuar më i ulët se në vendet e tjera, vetëm 50.4%. Por ekspertët e kanë lidhur këtë gjë me mutacionin që qarkullon në këtë vend. Gjithsesi studimet për këtë vaksinë janë ende të pakta.
Sinovac ka kërkuar miratimin nga rregullatorët e vendeve të tjera për miratimin e vaksinës së saj ‘CoronaVac’ për të siguruar parandalimin dhe kontrollin e pandemisë COVID-19. Aktualisht ky preparat po përdoret në 22 shtete, përfshi dhe Turqinë.
Por ende nuk ka aprovime nga agjencia ndërkombëtare e barnave EMA dhe FD. Në vitin 2009, kompania farmaceutike kineze, Sinovac ishte e para në të gjithë botën që mori miratimin për vaksinën e saj të gripit H1N1, apo siç njihet ndryshe gripi i derrit. Po ashtu, është dhe kompania e vetme furnizuese e vaksinës pandemike të gripit H5N1 në Kinë.