Detaje të reja janë zbardhur nga operacioni i koduar “Mersin”. Kontenieri me banane që vinte nga Ekuadori i përkiste babait të Arbër Çekajt, i arrestuar më herët për trafikimin e rreth 600 kg kokainë disa vite më parë.
Skenari i trafikimit është e njëjtë me atë të rastit të sasisë së konsiderueshme të kokainës, por babai i tij Selim Çekaj i ka thënë policisë që ta gjejnë ata kush e ka futur drogën në kontenier, pasi 72-vjeçari është tregtar frutash.
“Gjejeni ju se kush e ka futur drogën, unë jam tregtar frutash”, mësohet se është shprehur në Polici Selim Çekaj.
Operacioni i Policisë është koduar me emrin “Mersin” duke iu refeuar portit në Turqi nga ku është nisur kontenieri me banane.
Mësohet se kokaina ishte e ndarë në 31 pako, e cila ishte vendosur në muret e jashtme të kontenierit me banane. Burimet bëjnë me dije se kontenieri i bananeve ka dalë me pullë të kuqe gjatë kontrollit në port, ndërsa Selim Çekaj ka kërkuar që ai të hapej.
Operacioni në vendin tonë është kryer nga drejtoria e Policisë së Shtetit në mbështetje dhe nga drejtoria e doganave.