Komisioni Qendror i Zgjedhjeve ka miratuar fletën e votimit me emra për 12 qarqet e vendit.
Këtë e ka bërë të ditur kreu i KQZ, Ilirjan Celibashi në mbledhjen e ditës së sotme duke mos miratuar fletën e votimit me numra. Për këtë vendim, mund të bëhet ankim brenda tre ditëve në KAS.
“Në lidhje me përmbajtjen e fletës së votimit, vendimi i komisionerit është ky, miratimin e fletës së votimit me përmbajtje respective për çdo qark në formatin landscape duke përshtatur sipas numrit të kandidatëve madhësinë e fontit dhe stilizimet e logove.
Për çdo qark, mënyra e të shkruarit, fonti dhe karakteristika të tjera teknike të shkrimit do të varet nga numri i kandidatëve për çdo qark”, tha Celibashi.
Madhësia e fletës nuk do të ndryshojë nga qarku në qark, ndërsa madhësia e shkrimit ndryshon nga një qark në tjetrin për shkak të numrit të kandidatëve. Në Tiranë, ku janë 36 kandidatë për deputetë do të jenë emrat me germa më të vogla.