Kandidati për deputet i Partisë Demokratike, që është edhe drejtues politik i qarkut të Dibrës, Xhelal Mziu, është thirrur në prokurori lidhur me deklaratën e bërë dy ditë më parë pasi kundër tij është ngritur akuzë për “thirrje për armatosje ose marrje të padrejtë të komandës”.
Sipas Klan News, Mziu do të merret në pyetje për deklaratën që bëri në Maqellare, ku tha se do nëse do të kishte tentativa për vjedhje votash gjithçka do të përfundonte si ngjarja e Elbasanit, duke iu referuar vrasjes së Pjerin Xhuvanit.
“Kemi ngritur grupet e gatshme. Nga sot dhe në vazhdim çdo person i dyshimtë që lëviz në lagjet tuaja, mjafton një telefonatë dhe do ta pësojë njësoj si ai i Elbasanit”, tha Mziu para banorëve në Maqellarë.
Kjo deklaratë e Mziut u bë pas kapjes së dy punonjësve të Bashkisë Dibër, ku sipas hetimeve dy zyrtarët kishin para dhe karta identiteti të banorëve dhe janë në hetim për blerje votash.
Por një ditë më pas Mziu ka bërë një hap prapa duke kërkuar ndjesë për deklaratën, duke thënë se dhuna nuk është në kulturën e tij.