Ashtu siç pritej, Napoli ka arritur të kualifikohet për në turin tjetër të Ligës së Europës duke qenë se ka mundur me rezultatin e përgjithshëm 5-1 zviceranët e Zyrihut. Në ndeshjen e kthimit, të luajtur në Itali, Napoli fitoi 2-0 dhe titullar ishte mbrojtësi shkodran Elseid Hysaj që sërish nuk ka arritur të përmbushë pritshmëritë.
Pak ditë më parë, vetë Karlo Ançeloti shpjegoi arsyet që e bëjnë që të mos aktivizojë mbrojtësin shqiptar. Ai u shpreh se kur luan Hysaj, skuadra duhet që të kalojë më shumë nga krahu i majtë duke qenë se ky i fundi luan shumë në mbrojtje dhe Ançelotit nuk i pëlqen ky stil loje.
Këto kritika, sot janë dhënë edhe nga mediat italiane të cilat e kanë vlerësuar Hysajn me notën 6 në lidhje me paraqitjen e tij. “Hysaj bëri një paraqitje më shumë të kujdesshme sesa të mirë. Ai nuk do të gabojë në mbrojtje dhe rrallë herë mundohet që të dalë në sulm. Sulmi është më i vazhdueshëm dhe më i rrezikshëm nga krahu i majtë”, shkruajnë mediat italiane.