Ditët e fundit ka pasur disa lëvizje të rëndësishme në procesin për njohjen në Gjermani të patentëve të shoferëve nga Shqipëria dhe Kosova. Së shpejti priten edhe zhvillime të tjera.
Të gjithë ata që jetojnë në Gjermani e dinë mirë se nuk njihen ende përfundimisht patentat e Kosovës dhe Shqipërisë. Patentat e shtetasv e të Shqipërisë dhe Kosovës vlejnë gjashtë muaj, më pas duhet të konvertohen në patenta gjermane. Gjashtë muaj nis në momentin kur regjistroheni në ndonjë bashki.
Pas 6 muajsh duhet të keni kujdes pasi nëse ju kap policia që ngisni makinë me patentë të Kosovës apo Shqipërisë mund të dënoheni me gjoba të larta. Duhet të hyni në teste teorike dhe provim të praktikës. Testet mësohen përmes librave dhe aplikacioneve në internet, por kursi duhet bërë dhe kjo kushton disi.
Çështja e patentave është shtruar dhe gjatë vizitës së ministrit gjerman Heiko Mass në Prishtinë. Kjo çështje është trajtuar dhe në vizita të mëparshme të ministrave si të Kosovës dhe Shqipërisë në Gjermani, dhe është një prej çështjeve me prioritet edhe nga ambasadat. Para disa ditësh ambasadori i Kosovës në Gjermani është takuar drejt për drejt me drejtorin për rrugë federale dhe marrëveshje ndërkombëtare nga ministria federale e transportit dhe digjitalizimit ku kanë biseduar për vijimësinë e negociatave për njohje reciproke të patentave mes Kosovës dhe Gjermanisë. Këto negociata kanë nisur para disa muajsh me të dy shtetet tona.
Terreni i vazhdimit të konsultimeve ende nuk është përcaktuar saktë por nëse nuk ndodh diçka e paparashikueshme konsultimet në nivelin e grupeve të punës do të duhet të vazhdojnë në maj. Këto konsultime mund të jenë ndoshta dhe të fundit para përpilimit të marrëveshjes për njohjen e patentave të shoferëve. Verifikimi i punës së departamenteve për dhënien e patentave në Kosovë e Shqipëri ka nisur edhe më herët, sepse si në Tiranë dhe në Prishtinë ka pasur ndryshime serioze për lëshimin e patentave.
Një rol të rëndësishëm kanë luajtur ministritë në Prishtinë e në Tiranë të cilat kanë vënë në dispozicion dokumentacionet e kërkuara nga pala gjermane. Sidoqoftë, pas këtyre konsultimeve mes dy grupeve të punës pritet që procedura e njohjes së patentave të vazhdojë me konsultime në lande dhe përpilimin përfundimtar të dokumenteve për njohjen e patentave.
Sipas të gjitha gjasave pas arritjes së nënshkrimit dhe nënshkrimit të kësaj marrëveshje, kjo hyn në fuqi menjëherë. Kur do të ndodhë kjo nuk dihet me saktësi, por shpresohet që marrëveshja mund të arrihet deri nga fundi i vitit 2021.