Monedha e Euros regjistroi këtë të hënë nivelin më të ulët të vitit. Sipas kursit zyrtar të Bankës së Shqipërisë 1 euro u këmbye me 122.92 Lekë, nga 123.01 të premten e javës së kaluar.
Ky është niveli më i ulët Euros gjatë 2021 dhe në kuota të ngjashme me fundin e vitit të kaluar përpara festave të fundvitit.
Euro ka qenë e nënvlerësuar në tregun vendas, ndonëse në bursat ndërkombëtare ajo është në rritje që prej muajit prill, duke u këmbyer me 1.22 Dollarë, niveli më i lartë që nga shkurti.
Rënia e monedhës europiane në tregun vendas lidhet me faktorë të brendshëm, si oferta e lartë për Euro dhe kërkesa e ulët për to. Ndërsa oferta vjen nga një gjallërim i turizmit në vend.
Në rënie në tregun e brendshëm ishte dhe Dollari, ku një Dollar u këmbyeme 101.1 Lekë, nga 101.89 Lekë të premten e javës së kaluar, duke u këmbyer në nivelet më të ulëta që nga fillimi i Janarit të këtij viti.
Ndryshe ndodhi me Paundin britanik dhe Frangën zvicerane që forcuan pozitat respektivisht me 0.66 Lekë dhe 0.02 Lekë.