Kolegji i Posacëm i Apelimit ka zbardhur vendimin e tij lidhur me ish-kryetarin e Gjykatës Kushtetuese Bashkim Dedja. Vendim i cili nxori nga sistemi i drejtësisë përfundimisht njeriun më të lartë në kupolën e drejtësisë Shqiptare.
Por, marrja e këtij vendimi ka kaluar në disa momente të rëndësishme dhe që duhen mbajtur parasysh për të kuptuar situatën ku është katandisur drejtësia shqiptare këto vite. Në 13 qershor të vitit të shkuar, Komisioni i Pavarur i Kualifikimit do të deklaronte se pas shqyrtimit të dokumentacionit dhe verifikimeve që ka bërë ka vendosur që konfirmojë në detyrë z.Dedja.
Në daljen e parë pas rikonfirmimit në detyrë, kreu i Gjykatës Kushtetuese Bashkim Dedja, deklaroi se “Të kalosh vettingun si të kapërcesh varrin për së gjati”. Më tej ai vazhdonte në atë deklaratë, se “kjo reformë është gjë shumë e mirë sepse njëherë e mirë të ndahet elementi i cili ia ul vlerat kësaj reformë dhe ia ul vlerat këtij institucioni”.
Disa muaj më parë, KPA-ja rrëzoi vendimin e dhënë nga Shkalla e Parë, duke larguar Dedjan nga sistemi, ndërsa shumë nga justifikimet e pranuara prej këtyre të fundit, Apeli i ka rrëzuar plotësisht. Bashkim Dedja deri në marrjen e këtij vendimi ishte kryetar i Gjykatës Kushtetuese, institucionit më të lartë të drejtësisë në Shqipëri. Aktualisht Gjykata Kushtetuese prej muajsh është jashtë funksionit për shkak se të gjithë anëtarët e saj nuk e kaluan vetingun dhe institucionet e reja të reformës në drejtësi ende nuk kanë përfunduar me konsolidimin e tyre të plotë çka ka sjellë dhe paralizim të punës në sistemin e drejtësisë dhe krijimin e mijëra dosjeve të cilat presin në radhë për tu marrë në shqyrtim.
Lexoni edhe :