Autoritetet greke kanë vënë në dispozicion një shpërblim prej 300 mijë euro për këdo që jep informacion për autorët e grabitjes me dhunë të një çifti në Atika, që përfundoi dhe me vrasjen e gruas së re 20 vjeçare, studente dhe nënë e një foshnje 11 muajshe.
Ngjarja që tronditi Greqinë u regjistrua në orët e para të mëngjesit në shtëpinë e tyre.
Sipas dëshmisë së bashkëshortit të viktimës, në banesën e tyre u futën tre persona, dy prej të cilëve ishin të gjatë dhe mbanin pistoleta dhe i treti i shkurtër.
32-vjeçari, me profesion pilot, ka treguar se dy flisnin mirë greqisht dhe kur u larguan folën në një gjuhë të huaj që ai nuk i kuptonte.
Autorët hynë në shtëpinë ku po qëndronin çifti dhe foshnja e tyre, pak pas orës 04.30 të mëngjesit, përmes një dritareje gjysmë bodrum nga prapa.
Ata më pas u ngjitën në shkallët e brendshme ku janë ndeshur në qenin Husky.
Qeni u gjet i ngordhur, i varur në kangjella. Nuk dihet nëse ata e vranë më parë apo e hodhën mbi kangjella në të cilat mbeti i varur dhe u mbyt.
Më pas grabitësit u ngjitën në papafingo, ku çifti po flinte. Fillimisht ata kanë neutralizuar burrin duke e lidhur në një cep të krevatit. Përveçse i kanë lidhur duar e këmbë, ata i kanë mbyllur dhe gojën me sytë.
Sipas burimeve të policisë, grabitësit kërcënuan çiftin se do tu vrisnin foshnjen që ishte në shtrat nëse nuk tregonin se ku ishin paratë.
Kjo mund të ketë provokuar reagimin e nënës 20-vjeçare, e cila gjithashtu dinte arte marciale.
Sidoqoftë, autorët e krimit kanë arritur ta hedhin në shtrat, ku ndoshta e kanë mbytur me bluzën e saj.
Sipas të njëjtit informacion, autorët më në fund kanë arritur të marrin 10,000 euro nga shtëpia dhe janë zhdukur.
32-vjeçari, siç u tha policisë, arriti të kapte telefonin celular dhe të njoftonte policinë.
Disa minuta më vonë, mbërritën oficerët e policisë të cilët hynë në shtëpi nga dritarja, nga ku kishin hyrë autorët, dhe u gjetën para skenës së tmerrshme të krimit.
Foshnja më vonë u mor nga gjyshja e tij dhe është mirë me shëndet.
Vihet re se brenda shtëpisë kishte njëkamera sigurie, e cila ishte thyer nga autorët e krimit.
Policia po kërkon materiale nga kamera të tjera në të gjithë zonën, me shpresën se autorët do të jenë filmuar dhe imazhi do të zbulojë informacione që mund të ndihmojnë në gjetjen e tyre.