Kreu i grupit parlamentar të PS-së Taulant Balla me anë të një postimi në Facebook, shprehet se progresistët europianë janë kundër përdorimit të dhunës ndaj institucioneve të shtetit, pasi sipas tij kanë theksuar se është e papranueshme dhe e patolerueshme.
Kreu i grupit parlamentar të PS-së bëri këtë postim, pas pjesmarrjes pjesë në Kongresin Elektoral të Partisë Socialiste Europiane, ku ishin të pranishëm kryeministra dhe liderë të socialdemokracisë europiane.
Balla takoi Presidentin e PES Sergei Stanishev, Presidentin e Grupit Socialist dhe Demokrat në Parlamentin Europian Udo Bullmann dhe Zëvendës Presidentin e Komisionit Europian Frans Timmermans.
Reagimi i plotë:
Kongresi Elektoral i Partisë Socialiste Europiane, në cilën ne socialistët shqiptarë jemi anëtarë, i dha sot mbështetjen kandidatit të përbashkët për President të Komisionit Europian Frans Timmermans.
Aktualisht Zëvendës President i Komisionit Frans Timmermans, por edhe në detyrën e mëparshme si Ministër i Jashtëm i Hollandës, mbetet një europeist i paepur, por dhe një mbështetës i anëtarësimit të Shqipërisë në familjen europiane.
Gjatë punimeve të Kongresit ku merrnin pjesë kryeministra dhe liderë të socialdemokracisë europiane, zhvillova biseda me Presidentin e PES Sergei Stanishev, Presidentin e Grupit Socialist dhe Demokrat ne Parlamentin Europian Udo Bullmann dhe sigurisht me Zëvendës Presidentin e Komisionit Europian Frans Timmermans.
Qëndrimi është shumë i qartë:
“Për progresistët europianë ngjarjet e një jave më parë në Tiranë, përdorimi i dhunës kundër institucioneve të shtetit, e nxitur haptazi dhe me forcë nga lidershipi i opozitës, si një metodë për marrjen e pushtetit dhe një përpjekje për delegjitimizimin e proceseve demokratike në Shqipëri është diçka e papranueshme dhe e patolerueshme. Ndryshimi i qeverisë në çdo demokraci mund të ndodhë vetëm përmes zgjedhjeve, e jo përmes kërcënimeve, bojkotit apo dorëheqjeve nga mandatet, e kurrësesi përmes përdorimit të çfarëdo forme të dhunës.
Në Shqipëri kjo krizë artificiale politike e inicijuar nga dy parti të opozitës nuk mund të përdoret për të penguar zbatimin e reformës në drejtësi, e cila është themelore për zhvillimin ekonomik dhe social të Shqipërisë dhe për procesin e bisedimeve të anëtarësimit të Shqipërisë në BE. Asnjë parti politike në Shqipëri nuk ka të drejtë të dëmtojë perspektivën europiane të Shqipërisë”.
