Edvin Kulluri, pjesë e grupimit për PD që kërkon largimin e Bashës sepse e cilëson si përgjegjës për humbjen e zgjedhjeve të 25 prillit ka thënë se e kanë gati kandidatin që do të futet në garë për të marrë postin drejtues.
Kulluri theksoi se garancia që do të kërkojnë do të jenë listat e sakta të anëtarësisë, ndërsa akuzoi sekretarin e përgjithshëm, Gazment Bardhin se i ndan anëtarët në aktivë dhe pasivë për të manipuluar zgjedhjet.
Edvin Kulluri: Jemi të vendosur për t’i shkuar deri fund dhe për të pasur një kandidat zyrtar i cili do të marrë pjesë në garë nëse Basha nuk e skualifikon. Kryesia e PD me këtë statut që është sot, që është qesharake mund të skualifikojë kandidatët për kryetarë të PD. Psh, Lulzim Basha komisionin e ngre vetë, listat e anëtarësisë mund t’i manipulojë vetë, në fund edhe kandidatët i nxjerr vetë dhe si gjithmonë do të fitojë vetë.
Denis Dyrnjaja: Nëse Basha fiton prap çfarë do të bëni, do të largoheni nga PD?
Edvin Kulluri: Këtë do e shohim pas ditës së zgjedhjeve, ne kemi qenë të vendosur për të mos u larguar nga PD se e kemi konsideruar aset kombëtar, një vlerë të këtij vendi. Nuk kam ikur as në 2017, as në 2019, këtu jam.
Denis Dyrnjaja: Keni përcaktuar një kandidat?
Edvin Kulluri: Po shkohet drejt selektimit të emrit të kandidatit pas një bisede shumë kolegjiale dhe të hapur me njëri-tjetrin, ku askush nuk vendos në mënyrë apriori dhe personale se çfarë do bëjë.
Denis Dyrnjaja: Nuk do të kërkoni garanci?
Edvin Kulluri: Do kërkojmë lista të sakta të anëtarësisë, jo lista me aktivë dhe pasivë sic i bën Sekretari i Përgjithshëm sot, anëtarë aktiv dhe pasiv.
Denis Dyrnjaja: Pse ndodh kjo?
Edvin Kulluri: Nuk e di, duhet të pyesni Bashën dhe Bardhin. Kjo bëhet për të manipuluar zgjedhjet.