Policia e Shkodrës ka vënë në pranga një kolegun e tyre, shtetasin V.N., 53 vjeç pasi ishte një nga personat e përfshirë në aksidentin tragjik sot në vendin e quajtur “Omaraj”.
Nga vëzhgimet e kamerave të sigurisë, u pa se efektivi i cili po drejtonte mjetin e tij tip “Audi” të jetë bërë shkaktar i aksidentit.
Bashkë me të është arrestuar edhe një 19-vjeçar, drejtues i mjetit tip Mercedes Benz, në të cilin ndodheshin 2 djemtë që humbën jetën, Erglis Delaj 20 vjeç dhe Sergjo Kukaj 21 vjeç.
Njoftimi i policisë
Shkodër – Drejtoria Rajonale e SHÇBA Shkodër – Lezhë arrestoi në flagrancë 1 punonjës policie dhe 1 shtetas tjetër, pasi ndërsa drejtonin automjetet e tyre, janë përfshirë në një aksident të rëndë automobilistik, ku ndërruan jetë 2 shtetas.
Në vendin e quajtur “Omaraj”, Njësia Administrative Gruemirë në Malësinë e Madhe janë përfshirë në aksident, një mjet tip “Audi” me drejtues shtetasin V. N., dhe një mjet tip “Mercedes Benz“ me drejtues shtetasin M.B., me të cilin udhëtonin si pasagjerë shtetasit S.K., 21 vjeç, dhe shtetasi E.D., 20 vjeç.
Automjetet e përfshira në aksident po udhëtonin me drejtimin Koplik – Shkodër. Drejtuesi i automjetit “Mercedez” pasi ka humbur kontrollin e mjetit është përplasur me kolonën e një muri rrethues. Si pasojë e kësaj përplasje ka gjetur vdekjen e menjëhershme shtetasi S.K., ndërsa shtetasi E.D. ndërroi jetë teksa po transportohej për në spitalin rajonal.
I dëmtuar nga ky aksident ka mbetur edhe drejtuesi i automjetit “Audi“, i cili ndodhet i shtruar në repartin e kirurgjisë për shkak të dëmtimeve të marra.
Grupi hetimor ka siguruar pamjet filmike nga momenti i aksidentit dhe pas hetimeve në vendngjarje kryen arrestimin në flagrancë të shtetasve:
• M.B., 19 vjeç;
• V.N., 53 vjeç, me detyrë punonjës policie në Komisariatin e Policisë së Malësisë së Madhe.
Hetimet vazhdojnë për zbardhjen e plotë të kësaj ngjarje.