Ngrohja globale dhe shkrirja e akullnajave kanë shkaktuar ndryshime në boshtin e rrotullimit të Tokës.
Ky është rezultati i një studimi të kryer nga Instituti i Shkencave Gjeografike dhe Kërkimit mbi Burimet Natyrore në Akademinë Kineze të Shkencave në Pekin.
Studimi, i botuar në revistën Geophysical Research Letters tregon se Poli i Veriut dhe Poli i Jugut kanë lëvizur të paktën 4 metra që nga viti 1980, si rezultat i pasojave të aktivitetit njerëzor në natyrë.
Në të kaluarën, vetëm faktorët natyrorë siç janë rrymat oqeanike dhe lëvizjet gjeologjike në thellësitë e tokës, mund të ndikonin në ndryshimin e pozicionit të poleve.
Rezultati i këtij studimi na tregon se duke filluar që nga vitet 1990, shkrirja e akullnajave si pasojë e ngrohjes globale ka ndikuar që polet të lëvizin në drejtime të reja. Gjithashtu, shpejtësia mesatare e lëvizjes po rritet: mes viteve ’95 dhe 2000 polet lëvizën 17 herë më shpejt se sa mes viteve 1981 dhe 1995.