Olger Mustafa alias “Geri Muçi”, i konsideruar si i “forti” i Korçës është dënuar me 25 vite burg. Vendimi është dhënë disa orë më parë nga gjykata e Korçës.
Ngjarja e rëndë është shënuar në 17 janar 2019, ku Mustafa e ka qëlluar me 5 plumba viktimën. Vrasja e Altin Balliut, erdhi në një moment kur një grup djemsh ishin mbledhur në një lokal për të festuar Vitin e Ri në qytetin e Korçës. Konflikti ka nisur në rrethana banale, për dritat e makinës dhe më pas sherri ka filluar fizikisht. Mustafa një herë i ka sulmuar me makinë, herën e dytë me levë dhe herën e tretë i ka sulmuar me armë zjarri, duke lënë të vdekur në vend Altin Balliun.
Në sencën e mëparshme, prokurori Edmond Shytko, bërë ndryshimin e akuzës, ku nga “Vrasje me paramendim”, e akuzoi Mustafën për veprën penale të “Vrasjes me dashje”.
Duke u mbështetur në këtë akuzë, prokurori Shytko i kërkoi gjykatës së Korçës, dënimin me 22 vite burgim. Por ditën e sotme gjykata e Korçës ka dalë me vendim përfundimtar, duke e dënuar me 25 vite burgim, për akuzën e “Vrasjes me paramendim”.
Familjarët e viktimës kërkojnë burgim përjetë për autorin e vrasjes ndërsa kanë hedhur akuza të rënda për prokurorin Shytko, i cili nuk ka qenë prezent në seancën e fundit pasi ka qenë në SHBA.