Klubi i Lacios sot do të zgjidhë pasiguritë e të ardhmes me një takim që do të vendosë pikat mbi “i” për çështje shumë delikate. Rinovimi i trajnerit Inzagi, vazhdimësia e disa prej yjeve të skuadrës, e për çudi, tashmë vihet në diskutim edhe Igli Tare.
Sipas medieve italiane, në një takim që do të zhvillohet në klubin e Lacios, do të diskutohet edhe vazhdimësia e Tares te lacialët. Pavarësisht faktit se ai ishte arkitekti i një skuadre që u kthye në pretendente në Itali dhe siguroi edhe praninë në Ligën e Kampioneve, ndaj tij rëndon dështimi në merkaton e fundit, me lojtarë që janë shfaqur shumë larg pritshmërisë, mes të cilëve edhe Vedat Muriqi, për të cilin u bë shpenzim kolosal por nuk ka justifikuar ende veten.
Pakkush vë në dyshim aftësitë e Tares si dhe përkushtimin e tij ndaj klubit për të cilin ka refuzuar oferta të rëndësishme. Por tani ngrihen pikëpyetje nëse disa gjëra mund të bëheshin ndryshe dhe nëse projekti i klubit mund të bëjë hapa përpara edhe me një figurë tjetër në rolin e drejtorit sportiv. Tare ka një kontratë deri në vitin 2023 me Lacion, nga e cila përfiton 2 milionë euro në sezon, por ajo mund të prishet me marrëveshje, pasi drejtuesi shqiptar është i lidhur ngushtë me presidentin Lotito ndaj të cilit shpesh është shprehur se ndjehet borxhli për besimin e pamasë që i ka dhënë duke e orientuar drejt karrierës së re pasi la futbollin e luajtur.