Një tjetër shqiptar ka humbur jetën në burgjet greke. Viktima është 33 vjeçari nga Vlora, Gëzim Shekaj, i cili ka ndërruar jetë në qeli. Edhe më i rëndë është fakti se ai mbahej në burg përtej afatit të përcaktuar nga gjykata greke.
Ngjarja ndodhi ditën e mërkurë në burgun famëkeq “Koridalo” të Athinës, ndërkohë ende janë të paqarta rrethanat e vdekjes së të riut shqiptar. Ai kishte 20 ditë që kishte përfunduar kryerjen e dënimit, por nuk po nxirrej nga qelia.
Një mik i 33 vjeçarit ka dyshime për vdekjen dhe shprehet se përgjatë 20 ditëve në mënyrë të jashtëligjshme që ai është mbajtur në burg, i janë injektuar gjilpëra vazhdimisht. Fisnik Hasi deklaroi se injektimi i 4 gjilpërave në trupin e Shekajt është bërë me qëllim për ta çuar 33-vjeçarin drejt vdekjes.
“Shoku im i burgut, Gëzim Shekaj është gjetur i varur. Mjekët grekë i kanë injektuar 4 gjilpëra. Ai është keqtrajtuar në burg. Grekët nuk donin që ai të dilte i gjallë”, tha Hasi, i cili ka qenë në të njëjtën qeli me 33-vjeçarin nga Vlora.
Hasi akuzon dhe policinë greke se po përpiqet që të mbajë të fshehtë ngjarjen, ndërsa nga Ambasada shqiptare në Athinë nuk ka reagim. Gjatë 2 muajve të fundit, pikërisht pas vrasjes së ekstremistit grek Konstadinos Kaçifas në Bularat të Gjirokastrës, ndaj emigrantëve shqiptarë në Greqi kanë humbur jetën 9 persona dhe u vetëvranë 4 të tjerë, në burgjet greke.