Një fatkeqësi ka ndodhur në botën e motorçiklizmit, saktësisht në Moto3. Gjatë provave të djeshme në Çmimin e Madh të Italisë, piloti 19-vjeçar Xhejzon Dupaskier pësoi një aksident të rëndë.
Pasi humbi ekuilibrin e motorit, ai mori goditje po nga motori i tij në kokë dhe gjoks, ndërsa edhe dy pilotët që vinin pas tij nuk mundën ta shmangnin duke e goditur gjithashtu. Zviceriani mbeti pa shenja jete në pistë, ndërsa u transferua në spital me helikopter duke u futur menjëherë në sallën e operacionit.
Gjendja ishte shumë e rëndë dhe ditën e sotme erdhi dhe lajmi më i keq i mundshëm. Dupaskier ndërroi jetë, teksa pasioni i tij i mori jetën në një moshë fare të re.