Presidenti i Serbisë, Aleksandar Vuçiç tha pas takimit me kryeministrin e Kosovës, Albin Kurti se janë dakorduar që dialogu i nivelit të lartë të vazhdojë deri në fund të korrikut. Ai gjithashtu foli edhe për mospajtimet mes tyre.
“U ra dakord për të vazhduar dialogun deri në fund të korrikut”, tha Vuçiç pas takimit.
“Delegacioni shqiptar nuk dëshiron ta përmbushë atë që nënshkroi. Ata e quajnë provokim faktin që serbët duan të marrin pjesë në liturgji… Mungesë e plotë e realitetit”, tha Vuçiç para gazetarëve.
“Nuk kam marrë pjesë në asnjë takim tjetër si ky”, tha presidenti serb. Ai tha se kishte folur ashpër me Kurtin.
“Unë u përgjigja ashpër, por nuk e kalova kufirin. Njeriu erdhi që të mos binte dakord për asgjë. Ai tha: “Kam ardhur të të pyes kur do ta njohësh Kosovën”. Unë i thashë: “Asnjëherë”. Ai shpërtheu”, theksoi Vuçiç.