Armando Broja është kthyer në një nga lojtarët e rinj më të vlerësuar në futbollin europian falë paraqitjeve të tij me fanellën e Vitese në kampionatin holandez në këtë vit. Sulmuesi i talentuar shqiptar është paraqitur më mirë se sa kanë bërë emra si Ibrahimoviç apo Suarez në debutimin e tyre në këtë kampionat ndaj nuk është çudi që tashmë ai po monitorohet me shumë kujdes për atë që jep në fushën e lojës dhe të jetë kandidat për çmime të rëndësishme që në moshë të re.
Gazeta italiane “Tuttosport”, si çdo vit ka përpiluar listën e 100 futbollistëve të rinj më të talentuar që garojnë për çmimin “Golden Boy”, një vlerësim prestigjioz që në të kaluarën u ka hapur rrugë talenteve si Mbape e Haland. Në listën e këtij edicioni që merr për bazë lojtarë të lindur nga 1 janari 2000 e më tutje, është përfshirë edhe emri i talentit shqiptar.
Një paradoks po të marrësh parasysh ndeshjet e fundit të kombëtares, ku u vendos që atij të mos i jepeshin minuta në sfidën ndaj Çekisë dhe pas duelit kundër Andorrës me U21, u la i lirë të kthehej për të filluar pushimet. Trajneri Reja kohët e fundit nuk e merr në konsideratë futbollistin, diçka e pakuptueshme duke pasur parasysh se ai po bëhet një emër i rëndësishëm në arenën ndërkombëtare aq sa edhe Çelsi po mendon seriozisht ta kthejë nga huazimi te Vitese.