Neymar tashmë prej një viti e gjysmë luan për skuadrën franceze të PSG-së, por nuk harron shokët dhe kohën e kaluar te ish-skuadra e tij, Barcelona. Madje për njërin në veçanti ai përlotet, dhe flasim për Lionel Messin.
Për shkak të një dëmtimi Neymar aktualisht është jashtë fushës por në një intervistë për Sport Bible është prekur teksa ka folur për argjentinasin. “E them tani për të gjithë, se kur më duhej ndihma, më i miri në botë (Messi) ishte aty për mua për të më përkrahur”.
Kur u pyet për kërkesën që Messi i kishte bërë që të rikthehej te Barcelona, mes lotëve u përgjigj: “Është e vështirë, është e vështirë. Të jem i sinqertë, është shumë e vështirë, Leo ishte një djalë shumë i veçantë për mua në Barcelonë”.
Ai gjithashtu zbuloi mesazhin që Messi ia dërgoi kur Neymar arriti në Camp Nou: “Unë jam këtu për të ndihmuar”, i kishte thënë Messi brazilianit.