Anglia, Kroacia dhe Çekia (si vend i tretë) janë tre skuadrat që janë kualifikuar ngë grupi D. “Tre Luanët” e Gareth Southgate mposhtën 1-0 Çekinë në “Wembley”, sfidë e vlefshme për vendin e parë në grup. Golin e fitores e realizoi Raheem Sterling në minutën e 12-të.
Ylli i Manchester City përfitoi nga një kros i Jack Grealish dhe shënoi me kokë. Vendi i parë me 7 pikë për Anglinë, që realizon objektivin minimal të Euro 2020.
Ndeshja plot emocione u zhvillua në “Hampden Park” të Glasgow. Fitorja ishte alternativa e vetme për Kroacinë dhe Skocinë. Në fund festuan nënkampionët e botës, që siguruan vendin e dytë në grup pas suksesit 3-1.
Nikola Vlasic shfrytëzoi një asist të Perisic dhe zhbllokoi takimin në minutën e 17-të. Vendasit nuk u dorëzuan dhe Callum McGregor ndezi atmosferën në stadium, duke gjetur golin e barazimit në limitet e pjesës së parë. Shumë i bukur goli i mesfushorit të Celtic. Pjesa e dytë foli për Kroacinë, që përfitoi nga eksperienca dhe kualiteti. Luka Modric dhuroi “show” pas një ore lojë me golin e tij, teksa triumfi u vulos nga goli me kokë i Ivan Perisic.