Tifozët e Partizanit me siguri nuk do ta kujtojnë me shumë nostalgji Franko Lerdën. Tekniku erdhi në stolin e të kuqve pas sezonit të titullit kampion për të ndihmuat skuadrën që të bënte hapin para, por ekipi u tjetërsua plotësisht dhe nuk arriti të bënte atë që kërkohej prej tij, duke mos u konfirmuar mes pretendentëve në Superiore.
Lerda këtë një vit e gjysmë, që nga largimi prej të kuqve, e ka kaluar në heshtje të plotë, duke mos qenë pjesë e asnjë skuadre pas eksperiencës shqiptare që nuk shkoi ashtu siç priste as vetë ai. Por tashmë ai është gati që të kthehet përsëri në pankinë, duke shpresuar që të ketë interes për të dhe një ofertë nga një klub që t’i përshtatet.
“Po pres me durim dhe me besim. Jam gati të rinis nga e para me entuziazëm. Po pres telefonatën e duhur që të rifilloj”, ishin fjalët e teknikut italian për “TMW”, ku u intervistua rreth situatës aktuale të trajnerëve të Serisë A. Megjithatë, për Lerdën ka pak mundësi që të provojë aktualisht bankinën e një ekipi në elitën e futbollit italian. Eksperiencat më të rëndësishme të tij kanë qenë pak muaj në Serinë B ku ka provuar pankinën e Torinos, Krotones e Viçencës.