Bojkotimi i Parlamentit është një hap prapa ka thënë për DW zëdhënësi i CDU/CSU Florian Hahn. Madje ai ka qenë mjaft i ashpër me opozitën, e cila edhe pasaardhësve në listën e deputetëve u ka kërkuar të mos pranojnë mandatet.
“Kjo është një situatë e vështirë: Zakonisht ka një pasardhës për dikë që lëshon një mandat. Në se ka njerëz të arsyeshëm që janë në gjendje ta bëjnë këtë, atëherë këta duhet të zënë vendet e mbetura bosh”, thotë ai.
Por këtë nuk e dëshiron kreu partiak, dhe Hahn është mjaft kritik në këtë pikë: “Ky ishte një gabim i rëndë dhe në fakt nuk është partia ajo që vendos për mandatin. Kjo është pyetja tjetër sesi kuptohet demokracia. Janë njerëzit, përfaqësuesit e popullit që janë zgjedhur dhe jo partia, ata që vendosin nëse dikush do ta dorëzojë mandatin apo jo”.
Për zyrtarin gjerman do të kishte kuptim të bëheshin zgjedhje të reja, të imponuara sipas tij, pasi kjo është precedent që mund të përsëritet.
“E çfarë do të mësonin partitë nëse do të imponoheshin zgjedhje të reja në një mënyrë që nuk parashikohet nga kushtetuta? Ta zëmë se do të kishim kështu një parti tjetër në pushtet. Çfarë do të mësonte partia opozitare nga kjo? Ajo do të mësonte se duke bojkotuar sistemin dhe duke dorëzuar mandatet sërish mund të imponoheshin zgjedhje të reja. Këtu shtrohet pyetja se ku dëshiron të shkojë Shqipëria. Dëshiron të jetë një vend i qëndrueshëm demokratik, dëshiron të bëhet pjesë e BE-së? Opozita bën mirë që i shoqëron në mënyrë kritike proceset reformuese. Por jo bojkoti, bojkoti nuk është i përshtatshëm për përkrahjen e Shqipërisë në rrugën e saj drejt BE-së”, thotë Hahn.
Intervista e tij vjen në një ditë kur në Tiranë ka mbërritur delegacioni i Parlamentit Europian.