Masakra e Filatit është përkujtuar në një ceremoni të posaçme nga PDIU. Duke kujtuar 400 të masakruarit prej trupave greke në gusht të vitit 1944, pjesëmarrësit në aktivitet kanë theksuar se duhet të vazhdojnë përpjekjet për çështjen çame. Kreu i PDIU-së, Shpëtim Idrizi, gjatë aktivitetit ka rikujtuar se Greqia është vend me parime të dyfishta pasi nga njëra anë kërkon të drejtat e minoritetit që jeton në Shqipëri, por brenda territorit të saj nuk njeh pakicat.
Idrizi tha se: “Nga një anë flasin për të drejtat e njeriut, për të drejtat e minoriteteve dhe nga ana tjetër janë i vetmi vend në botë që jo vetëm nuk njeh minoritetet por nuk ka nënshkruar as Konventën kuadër për të drejtat e minoriteteve”.
Në fjalën e tij Idrizi ka thumbuar edhe Ramën. “Sot është Samiti i Diasporës. Por, sot për herë të parë u harrua të ftohej një përfaqësues nga çamëria, duke lënë bosh hartën identitare të kombit shqiptar. Mesa duket Ramës nuk i mjafton ajo që ka bërë me çështjen çame dhe pazaret me Greqinë, theksoi kreu i PDIU-së.
Ish-zëvendëskryeministrja e Kosovës, Edita Tahiri, kërkoi bashkëpunimin e të gjithë faktorëve për çështje çame. Ajo tha: “Çamëria është rasti i spastrimeve që ne sot e kësaj dite ne ende duhet dhe do të angazhohemi për riatdhesimin”. Gjatë ceremonisë, PDIU ndau çmime vlerësuese për familjarët e të rënëve në Filat dhe personalitetet që kontribuan në çështjen çame.