Një palestinez humbi jetën dhe katër të tjerë u plagosën në përleshjet me ushtrinë izraelite ditën e djehsme në Gaza. Mijëra palestinezë protestuan në disa zona të ndryshme të kufirit të Gazës, si vazhdim i protestave të quajtura “Marshi i Rikthimit” dhe që zhvillohen rregullisht çdo të premte, që prej 30 Marsit. Një palestinez 26-vjeçar humbi jetën, kurse 4 të tjerë mbetën të plagosur në përplasjet përgjatë kufirit, raporton Ministria e Shëndetësisë palestineze.
Ushtria izraelite tha në një deklaratë se disa palestinezë kishin hedhur mjete shpërthyese, granata, goma të djegura dhe gurë ndaj ushtarëve të saj në gardhin kufitar, ndonëse asnjë izraelit nuk mbeti i plagosur. Ushtria izraelite ka vrarë mbi 200 palestinezë që kur filluan protestat kufitare në mars, thonë mjekët e Gazës, ndërsa nga krahu tjetër vetëm një ushtar izraelit është vrarë nga një snajper palestinez.