“Panorama.al” publikon dëshminë e parë të Nikolin Huba para oficerëve të hetimit. 54-vjeçari mbeti i plagosur me dy plumba në këmbë, mëngjesin e kësaj të shtune në Shkodër.
Ish-kryetari i Partisë Socialiste në Vaun e Dejës, është dërguar për në spitalin e Traumës në Tiranë për një mjekim më të specializuar.
Korespondenti i “Panorama”, bën me dije se Huba menjeherë sapo ka dalë nga salla e operacionit është marrë në pyetje, nga ku mësohet se ka deklaruar që nuk ka asnjë konflikt dhe se “nuk e di se kush janë autorët” apo arsyet pse e kanë plagosur.
I plagosuri ka deklaruar se është qëlluar me armë zjarri sapo kishte dalë nga një kafene dhe se ka arritur të shohë dy persona me motorr dhe me skafandër në kokë.
“Sapo kam dale nga kafja, dy persona me motor me skafandër në kokë janë afruar dhe më kanë qëlluar. Nuk me kanë thëne asnjë fjalë. Unë nuk e di se kush janë sepse nuk kam asnjë konflikt me askënd. Vetëm qëlluan dhe ikën, nuk kam asnjë ide përse me qëlluan”, është shprehur ai.