Gjatë prezantimit të programit politik të qeverisë së tij të re, kryeministri Edi Rama u shpreh se është i gatshëm të dialogojë me opozitën, duke u thënë se me urdhra e kërcënime nuk do arrijnë gjë.
“Me komunikim të drejtpërdrejtë, duke folur e dëgjuar njëri-tjetrin, mund të merremi vesh për shumëçka. Asnjëherë dhe për asnjë arsye unë dhe kjo shumicë nuk do të pranojmë asnjë lloj ndërmjetësuesi të huaj për të zgjidhur problemet, ngërçet, krizat e brendshme politike apo institucionale. Ato shkaktohen allashqiptarçe nga ne dhe nga ju, jo nga miqtë, ndaj duhet të zgjidhen vetëm nga ne dhe ju, jo duke folur anglisht, por vetëm shqip”, tha Rama.
Sakaq, ai i kërkoi opozitës dhe medias të kërkojnë nga qeveria çdo informacion të mundshëm zyrtar para se të shprehin qëndrimet e tyre.
“Do i lutesha të kërkojnë nga qeveria cdo informacion të mudnshëm zyrtar para se të mbulojnë qëndrimet e tyre publike. Lajmet e rreme dhe zvendësimet gjysëm të vërteta që janë gënjeshtra të mëdha dëmin psikologjik e bëjnë njësoj, si me dashje, si pa dashje”, tha Rama.