Policia e Durrësit arrestoi paraditen e së enjtes një doganier të dënuar më parë në Itali për trafik droge.
Sipas mediave, Julian Mandija u arrestua në vendin e tij të punës gjatë kohës që po ushtronte detyrën te sektori i kontrollit të kontenierëve.
42 vjeçari, i shpallur në kërkim ndërkombëtar u arrestua përkohësisht para se të ekstradohet për në Itali, ku ka qenë më parë i dënuar për 7 vjet e 4 muaj.
“Strukturat e Drejtorisë Vendore të Policisë Durrës, si rezultat i shkëmbimit të vazhdueshëm të informacioneve mes ZQK Interpol Tirana, bënë të mundur kapjen dhe arrestimin me qëllim ekstradimin drejt Italisë të shtetasit Julian Mandija, 42 vjeç, banues në Durrës. Ky shtetas ishte shpallur në kërkim ndërkombëtar, pasi Gjykata e Apelit në Aquila/Itali e ka dënuar me 7 vjet e 4 muaj burg për veprën penale “Trafikimi i lëndëve narkotike”, parashikuar nga Kodi Penal italian”, thuhej në njoftimin e policisë.