Kreu i qeverisë ishte në vendin fqinj për një ditë ku ka qenë pjesë e disa emisioneve dhe intervistave në gazeta për të pastruar sikur thotë ai, baltën që hodhi opozita mbi Shqipërinë. Në intervistën e fundit në Itali për TG5, kryeministri u shpreh se jashtë perimetrit 1 km të opozitës jeta vijon normalisht.
Kryeministri Edi Rama është rikthyer në Shqipëri pas vizitës në Itali. Kreu i qeverisë ishte në vendin fqinj për një ditë ku ka qenë pjesë e disa emisioneve dhe intervistave në gazeta për të pastruar sikur thotë ai, baltën që hodhi opozita mbi Shqipërinë.
“Për Tiranë pas 24h në Romë, tv më tv e gazetë më gazetë, për të pastruar sa mundej baltën e ziftin që lidershipi qorr i opozitës sonë, i hodhi ndërkombëtarisht Shqipërisë! Ata nxisin dhunë për hesapin e tyre krejt vetjak, po faturën e paguan vendi dhe ekonomia Humbësa Pa Dinjitet” shkruan Rama.
Në intervistën e fundit në Itali për TG5, kryeministri u shpreh se jashtë perimetrit 1 km të opozitës jeta vijon normalisht. “Kohët kanë ndryshuar radikalisht dhe tani ne jemi në një periudhë rritje të rëndësishme dhe kemi nivelin më të ulët të papunësisë në 27 vitet e fundit.
Po mundohemi të rritemi më shumë në sektorin e turizmit. Kemi arritur gati gjysmë milionë turistë italianë vitin e kaluar dhe duam ta tejkalojmë këtë numer. Edhe për këtë unë jam në Itali, për t’i thënë të gjithëve që ato pamje jo pozitive janë të një proteste që zhvillohet në një perimetër prej një kilometri, jashtë këtij perimetri jeta vazhdon.
Është një revoltë e estabilshmentit të vjetër që u largua pesë vite e gjysmë më parë me një milionë vota, një gjë e jashtëzakonshme për Shqipërinë dhe që ka lënë pas një vend me probleme të mëdha, të cilat ne po luftojmë. Ka shumë sfida, Shqipëria nuk është pa probleme, por jemi në rrugën e duhur.
Kemi një mandat, kemi disa detyrime kundrejt njerëzve dhe nuk mund të themi, tani anullojmë lojën, fillojmë nga fillimi dhe t’i lejojmë kundërshtarëve tanë të bëjnë skuadrën që ata duan për të fituar ndeshjen” përfundoi Rama.