Sot u inaguruan, dy fusha të reja sporti në shërbim të 453 fëmijëve dhe komunitetit përreth, të shkollës ‘’ Mustafa Gjestila ‘’, Burrel. Ndërtimi i këtyre fushave dhe pajisja e shkollës me mjete sportive janë pjesë e projektit ‘’Gol për Edukimin‘’ që mbështetet nga “Fondacioni ‘UEFA për Fëmijët” dhe zbatohet nga Save the Children në partneritet me organizatën IPSED.
Ky projekt ka për qëllim përmirësimin e infrastrukturës sportive në shkollë dhe zhvillimin e aktiviteteve sportive komunitare dhe zbatohet në tre shkolla 9-vjeçare në Shqipëri, përkatësisht në Burrel, Gjirokastër dhe Elbasan. Ai synon promovimin e një stili jetese të shëndetshme si dhe zhvillimin e potencialit të fëmijëve nëpërmjet sportit.
Kjo ndërhyrje, do t’i shërbejë jo vetëm nxënësve të shkollës, por të gjithë komunitetit të kësaj zone, duke promovuar aktivitete sportive, të cilat inkurajojnë pjesëmarrjen dhe përfshirjen e komunitetit në aktivitetet e shkollës.
Të pranishmit i përshëndeti kryebashkiaku i Matit Agron Malaj, i cili falenderoi financuesit e realizimit të këtij projekti të dobishëm për nxënësit e shkollës 9 vjeçare “Mustafa Gjestila” dhe banorët e lagjes “Drita”.
