Drejtuesi politik i Qarkut Dibër Ulsi Manja ishte sot pasdite në Këshillat Socialistë Burrel e Klos për të diskutuar me strukturat e këtyre dy njësivë administrative rreth zgjedhjeve të 25 prillit 2021.
Kryetari i Asamblesë Socialiste të Matit Hasan Pasha nënvizoi se NJA Burrel është njësia përcaktuese e fatit të zgjedhjeve për Partinë Socialiste të Bashkisë Mat. Ai tha se nga viti 2013 socialistët e Burrelit jo vetëm janë fitues të zgjedhjeve politike, por fitorja ka ardhur vetëm duke u thelluar. Pasha përmendi faktorët që ndikojnë në fitoren e socialistëve dhe çfarë duhet bërë më mirë në zgjedhjet e ardhshme.
Ministri i Drejtësisë Ulsi Manja tha se socialistët e Bashkisë Mat vërtetë janë fitues të disa zgjedhjeve politike dhe lokale, por nevojitet një analizë për t’u përmirësuar, për të qenë gati për zgjedhjet e 2023-it. “Ne duhet të përgatitemi që tani për zgjedhjet lokale, për t’i fituar katër bashkitë e Qarkut Dibër. Kujdesi i Qeverisë “Rama” nuk ka munguar për këtë rajon”, theksoi Manja.
Drejtuesi politik u shpreh se dikasteret do të bëjnë një vlerësim real për punën e drejtuesve lokal dhe rajonal. Në “sitë” do të kalojnë të gjithë.
“Drejtorët kanë për detyrë t’u përgjigjen në kohë rekord ankesave të qytetarëve. Në se do të konstatohen drejtues që nuk u përgjigjen shpejt dhe si duhet shqetësimeve të qytetarëve ato do të largohen”, pohoi Ulsi Manja në takimin me socialistët e Burrelit.
Kryebashkiaku i Matit Agron Malaj tha se ky subjekt politik nuk njeh humbje prej shumë vitesh dhe nuk do të njohë as në të ardhmen.
“Ne, -tha Malaj, vlerësojmë maksimalisht investimet e Qeverisë “Rama” në Mat. Për dekada me radhë kjo trevë ishte lënë në harresë, ndërkohë aktualisht ka ndryshime. Mati ka nevoja të tjera të rëndësishme. Kemi mbi 400 km rrugë rurale për t’u përmirësuar. Qendrat e tri njësive administrative kanë nevojë që të lidhen me asfalt. Po ashtu nevojiten të tjera investime për përmirësimin e infrastrukturës në Burrel”.
