Sot Bashkia Mat mbylli dëgjesat për paketën fiskale dhe projekt-buxhetin e vitit 2022 në njësinë administrative Burrel. Pas njësive Macukull, Derjan, Lis, Rukaj, Ulëz, Baz e Komsi kryetari i bashkisë Mat dhe administrata lokale bashkëbisedoi me qytetarët e Burrelit.
Banorët që morën fjalën pasi falenderuan bashkinë për investimet që janë kryer në të gjithë territorin e bashkisë, e veçanërisht në qytetin e Burrelit. Ata thanë se ka ardhur koha të mendohet më shumë për strehimin, investimet në lagjet periferike, shtimin e sipërfaqeve të gjelbërta, rritjen e kujdesit për mjedisin, ujërat e zeza, etj.
Në fjalën e tij kryebashkiaku Agron Malaj tha se gjatë këtij viti të vështirë, për shkak të pandemisë, është treguar kujdes për përmirësimin e jetesës së banorëve të Matit.
“Ne, tha Malaj, do të vijojmë punën për ndërtimin e Ujësjellësit të Zallë Gjoçajve dhe rrjetit të brendshëm në qytetin e Burrelit, duke synuar furnizimin pa ndërprerje të qytetit me ujë të pijshëm. Qendra Kulturore e Fëmijëve do të restaurohet nga e para, duke krijuar kushte komode për fëmijët e Matit. Sheshi “Ahmet Zogu” do të kthehet në pedonale të përheshme, gjë e cila u kishte munguar matjanëve më parë. Tregu industrial do të rehabilitohet ndërkohë në afërsi të thertores do të ndërtohet tregu i gjësë së gjallë. Në Burrel vitin e ardhshëm, vijoi kryetari i bashkisë, do të nisë funksionimin shkolla profesionale, për pesë profesione. Varrezat e dëshmorëve do të rehabilitohen ndërkohë që për varrezat do të kemi dëgjesa me publikun dhe pastaj do të ndërhyjmë, nëse qytetarët janë dakort.”
Malaj theksoi se ndërmarrja e pastrimit do të kalojë në vartësi të bashkisë dhe nga katër njësi që marrin shërbim aktualisht, pas 1 janarit 2022 do ta marrin këtë shërbim tetë njësi, pra të gjithë banorët e bashkisë Mat. Është menduar të shtohen pemët, lulet dhe shkurret dekorative. Lagja e Re dhe ajo prapa Muzeut Historik, pranë ish ndërmarrjes së Grumbullimit do të kenë rrugë dhe ndriçim brenda standarteve. Brenda vitit që vjen do të ndërtohen kanalizimet e ujërave të zeza dhe një impiant pastrimi.
Bashkia Mat, tha kryebashkiaku, ka treguar dhe do të vazhdojë kujdesin për terrenet sportive. Po ndërtohet fusha e re e sportit, pranë stadiumit “Liri Ballabani”. Në çdo shkollë 9 vjeçare dhe të mesme do të ketë terrene sportive, siç janë ndërtuar në tre shkolla të Burrelit.
Për herë të parë pas 30 vitesh në qytetin e Burrelit po ndërtohen tre pallate nga Enti Kombëtar i Banesave për familjet e pastreha në këtë bashki. Po ashtu është menduar për investimet në lagjen “Drita” dhe unazën e brendëshme dhe atë poshtë qytetit të Burrelit.
