Ndonëse një periudhë e shtrëngimit financiar, blerja e automjeteve mbetet një nga kërkesat më të shpeshta nga institucionet shtetërore, thuajse në çdo buxhet që paraqitet për miratim. Përjashtim nga kjo nuk bën as Kuvendi i Shqipërisë, i cili për këtë vit ka parashikuar blerjen e automjeteve të reja në vlerën e 158 milionë lekëve, raporton tirananews.al.
Tenderi është hapur më 23 janar të këtij viti, ndërkohë që në mars pritet të merret edhe vendimi për blerjen e automjeteve të reja.
Aktualisht Kuvendi ka një sërë makinash të markave të ndryshme dhe me vjetërsi mbi 10 vjet, të cilat kanë shfaqur kohët e fundit probleme të shumta.
Nuk dihet nëse automjetet e reja do të jenë në shërbim direkt të deputetëve apo të institucionit për nevojat e tjera, raporton tirananews.al.
Burime nga Kuvendi bëjnë me dije se nuk bëhet fjalë për vetëm një autoveturë, por për disa të tilla. Fillimisht plani ka qenë për 316 milionë lekë tender, por me sa duket vështirësitë financiare kanë bërë që Kuvendi të anulojë tenderin e parë dhe të rihapë një tender tjetër duke e përgjysmuar gati edhe fondin e vënë në dispozicion për blerjen e makinave të reja. /tirananews.al