Kuvendi i 11 Dhjetorit nuk do të mund ta shkarkojë Lulzim Bashën si kryetar të PD-së. Këtë siguri e dha nënkryetari i grupit parlamentar të PD-së Ervin Salianji, gjatë një interviste në studion e Klan News. Sipas tij, Kuvendi i 11 Dhjetorit është një tollovi për të dëmtuar PD-në dhe për ta mbajtur peng për interesa personale.
“Produkti i së shtunës do të jetë një tollovi dhe një miting për t’i treguar forcën SHBA-ve dhe për të tentuar që të rregullojnë punët e veta që nuk kanë lidhje fare me PD. Ai është një miting që demokratët për shkak të lidhjeve miqësore do të jenë aty dhe do të binden shumë shpejt që është në nga gjërat më të gabuara që kanë bërë në jetën e tyre politike”.
I pyetur nëse do të ketë tensione në Partinë Demokratike, pas zgjedhjeve që do të bëhen në Kuvendin e 11 Dhjetorit, Salianji tha se demokratët nuk do të përplasen. Ai shtoi se më 12 Dhjetor, do të jetë në zyrë ashtu si edhe drejtues të tjerë.
“Kuvendi i PD dhe anëtarësia ka votuar një statut ku përcakton që kryetari i PD shkarkohet nga kuvendi vetëm pas një mocioni të kaluar në këshillin kombëtar. Do të jem në zyrë, në selinë e PD. Secili prej drejtuesve të PD do të vazhdojë xzhendën e vet politike siç ka qenë. Askush nuk përplaset në PD, njihen që të gjithë me njëri-tjetrin”.
Sipas Salianjit për Kuvendin e 18 dhjetorit kanë plotësuar formularët 80% e anëtarësisë.