Anëtarëve të Këshillit Kombëtar të Partisë Demokratike u ka mbërritur një mesazh nga grupi i Rithemelimit pak para mbledhjes.
Anëtarët vihen në dijeni se 4446 delegate te Kuvendit Kombëtar rreth 44 mijë anëtarë kanë votuar për shkarkimin e Lulzim Bashës. Me anë të mesazhit, anëtarëve të Këshillit Kombëtar u kërkohet të mos bëhen pjesë e pengmarrjes së PD dhe të lexojnë e respektojnë vullnetin e shumicës.
Mesazhi i plotë:
Të nderuar anëtarë të Këshillit Kombëtar
4446 delegatë të Kuvendit Kombëtar të Partisë Demokratike dhe 44000 anëtarë të saj me vendimet e tyre historike kanë vendosur të marrin në dorë fatet e Partisë Demokratike duke shkarkuar Lulzim Bashën në një spektalël të vërtetë demokracie për t’i hapur rrugë rithemelimit të saj!
Komisioni u bën thirrje të gjithë anëtarëve të Këshillit Kombëtar të mos bëhen pjesë e pengmarrjes së PD dhe të lexojnë e respektojnë vullnetin e shumicës që shkarkoi kryetarin dhe jo të deputetit Basha që kërkon të shkarkojë shumicën!
Opozita nuk është as vulë dhe as bravë, por vullneti i demokratëve i shprehur qartë me votë në referendumin historik të dt 18 Dhjetor!
Sot është dita për t’ju bashkuar vullnetit të sovranit dhe jo për të përçarë e “përjashtuar” partinë për karrigen e thyer të ish kryetarit!
Komisioni i Rithemelimit