Kreu i Lëvizjes për Zhvillim Kombëtar Dashamir Shehi deklaron se Lulzim Basha dhe Sali Berisha e kanë mbaruar ciklin e tyre në politikë. Ai theksoi se ata po mbrojnë interesat e tyre.
Sipas Shehit, nëse vetë do e donin Partinë Demokratike, Basha dhe Berisha do duhet të ishin larguar për t’i hapur rrugën të rinjve.
“Unë i gjykoj që nuk mund të japin më kontribut. Unë gjykoj që këto personazhe e kanë bërë ciklin e vet. Këta po mbrojnë territorin e vet, asgjë më tepër. Debati në PD është një gjë e mirë. Por tani të vetgënjehemi se kjo është zgjidhja, kjo nuk është e sinqertë”, tha ai.
Kreu i LZHK deklaroi se nuk do të bëjnë një zgjedhje mes Bashës dhe Berishës, por do të bashkëpunojnë me atë që përafrohet me idetë e tyre.
“Ne aleatë jemi me të gjithë ata që janë kundër qeverisë. Ata mos të rrinë më bashkë. Ne nuk po shkojmë me bërë krushqi. Në politikë duhet të përcaktohen sa gjëra na bashkojnë dhe sa gjëra na ndajnë. Nuk ka ndonjë libër që e përcakton këtë punë. Kur të vijnë zgjedhjet do gjykojmë kush është më afër ideve tona.
Këta po bëjnë një gabim të madh duke bërë një luftë të tillë pa princip. Po mendove që do asgjësosh tjetrin, ti asgjëson një pjesë të asaj që është e jotja, tha Shehi.