Një aksident tragjik i ka marrë jetën një 38-vjeçari me origjinë shqiptare në Itali. Mediat lokale shkruajnë se pasditen e së hënës Klodian Tatani ishte duke udhëtuar me makinën e tij “Panda” në Dusino San Michele, midis Corso IV Novembre dhe via dei Mulini, kur një Ford Fusion që udhëtonte në drejtim të kundërt humbi kontrollin dhe e mori përpara pa i dhënë mundësinë të largohej. Ka qenë e nevojshme ndërhyrja e zjarrfikësve për ta nxjerrë atë, tashmë të pajetë, nga makina. Komuniteti i Villafranca vajton humbjen e Klodianit, 38-vjeçar i cili ishte një punëtor i palodhur, shumë i dashur dhe i vlerësuar. Ai lë pas gruan e tij Mejte dhe fëmijët e tyre Aleksin, Mejdjanin dhe Manuelin përkatësisht 14, 8 dhe 4 vjeç.
Miqtë e Klodianit kanë shkruar në rrjetet sociale: “Një familje shumë e mirë dhe e respektuar, e cila meriton gjithë përzemërsinë dhe mbështetjen tonë në këtë moment shumë të vështirë. Komuniteti ynë është i thirrur të mblidhet rreth këtyre fëmijëve dhe nënës të tyre për të mos i bërë ata të ndihen vetëm.”