Ende pa u plotësuar trupa e gjyqtarëve, gjykata kushtetuese ka sërish 5 vende bosh.
Presidenti i Republikës ka shpallur sot thirrjen për të gjithë kandidatët që duan të aplikojnë për t’u bërë gjyqtar Kushtetues, pasi Përparim Kalos i përfundon mandati.
Nesër parlamenti do të shpallë thirrjen për vendin vakant që krijohet për shkak se Altin Binajt i mbaron mandati.
Nga ana tjetër janë 3 vendet vakante që duhen plotësuar nga gjykata e Lartë, për të cilat askush nuk mund të thotë se kur do të zgjidhen gjyqtarët e rinj.
Por pavarësisht kësaj situate, Gjykata Kushtetuese është funksionale pasi gjyqtarët qëndrojnë në detyrë deri në zgjedhjen e pasardhësit.
Ajo që bie në sy është rasti i Përparim Kalos, gjyqtarit të zgjedhur nga presidenti Meta në 24 dhjetor të vitit 2020. Kalo i është drejtuar kushtetueses me kërkesë për zgjatjen e mandatit të tij duke kërkuar interpretimin e ligjit pasi sipas tij mandati plotësues duhet të llogaritet bazuar në ushtrimin efektiv të tij.
Por kjo kërkesë është hedhur poshtë nga gjykata Kushtetuese.
Gjyqtari Përparim Kalo është relatori i çështjes më të rëndësishme që ka aktualisht Kushtetuese; shkarkimi i Presidentit Ilir Meta.
Të martën në orën 10.00, 7 gjyqtarët do të shqyrtojnë për herë të parë vendimin e parlamentit për shkarkimin e një kryetari shteti .