Një ditë më parë Partia Socialiste ka mbyllur një marrëveshje me aleatët për zgjedhjet vendore të 30 qershorit. Kreu i grupit të PS-së, Taulant Ball është takuar me përfaqësues të 25 partive që bëjnë pjesë në koalicionin e të majtës.
Në këtë takim u vu theksi në nevojën për ndryshime në Kodin Zgjedhor dhe krijimin enjë administrate të pavarur.
Javën e ardhshme është dhe Kongresi i PS-së, më 23 mars, ku do të bëhen publike edhe emrat e 61 kandidatëve të së majtës për kryetar bashkie për zgjedhjet vendore.
Ndërkohë sot kryeministri Rama do të mbledhë ekipin socialist, pra, ministrat e qeverisë, kryesinë e PS-së dhe deputetët e grupit parlamentar në një takim informal në Elbasan. Mësohet se takimi do të jetë i fokusuar tek punimet e Kongresit të 23 marsit, dhe zgjedhjet vendore të 30 qershorit. Gjithashtu, në fokus të diskutimeve do të jetë dhe situata politike në vend. Ky takim vjen pas seancës plenare të Kuvendit ku do të betohen dhe deputetët e rinj të opozitës.