Alban Zeneli është demokrati që habiti më shumë kolegët e tij me vendimin për të pranuar mandatin e për të hyrë në Parlament, ndërkohë që ishte mjaft aktiv në protestën e fundit të opozitës para Kuvendit.
Duke folur për mediat pasi ka dalë nga salla e Kuvendit, Zeneli ka shpjeguar dhe arsyen e këtij vendimi.
“Më 5 mars kam thënë se qeveria Rama duhet të ikë një orë e më përpara. Nuk i heq asnjë presje atij mendimi. Kam thënë që mandati nuk është i imi dhe as i zotit Noka, por i qytetarëve. Prapë nuk kam ndryshuar mendim. Mandati është i qytetarëve që më kanë votuar edhe mua dhe zotin Noka. I vetmi ndryshim është se unë mendoj se: Interesat e qytetarëve që na kanë votuar, unë si Alban mund t’i mbroj më mirë brenda Parlamentit Shqiptar me statusin e Parlamentit, sesa në rrugë. Jetojmë në një sistem tjetër, ku shyqyr Zotit duhet të kemi mendim ndryshe. E para ne jemi njerëz, shyqyr që jemi njerëz dhe ndryshojmë. Jam konsultuar me miqtë e mi dhe votuesit e mi, Gjicin nuk e kam kontaktuar në asnjë rast”, ka thënë Zeneli.