Në 24 orët e fundit në vendin tonë janë regjistruar shifra të larta infektimesh nga koronavirusi. Mësohet se 2,383 qytetarë kanë rezultuar pozitivë me COVID nga 7,634 testime të kryera.
Fatkeqësisht 3 qytetarë nuk e kanë fituar betejën me koronavirusin gjatë këtyre 24 orëve. Më konkretisht bëhet fjalë për dy qytetarë nga Durrësi nga 73 vjeç dhe një qytetar nga Tirana, 85 vjeç.
Ministria e Shëndetësisë, teksa apelon qytetarët të vaksinohen njofton se në spitalet COVID po marrin trajtim mjekësor 134 pacientë ndërsa 14 prej tyre janë në gjendje më të rënduar.
Në të gjithë vendin janë 23,593 pacientë aktivë me koronavirus. Krahasuar me një ditë më parë kemi rënie të lehtë të rasteve dhe viktimave. Kujtojmë se dje u regjistruan 2,643 raste dhe 6 të vdekur.
Sakaq, në 24 orët e fundit mësohet se 1,754 qytetarë janë shëruar nga koronavirusi duke e çuar numrin e përgjithshëm të të shëruarve në 214,633 që prej fillimit të pandemisë dy vite më parë.
Ajo çka vihet re është se Tirana mban rekord sa i përket infektimeve ndërsa pasohet nga Durrësi, Vlora, Shkodra, Fier dhe Gjirokastra.